RUS
SMARTNEWS.KZ басылымының хабарлауынша, Ресей ІІМ 24 жастағы Қазақстан тумасына азаматтық беруін «өмірлік маңызды мәселе» деп атады.
23 шілдеде Ресей ІІМ-нің ресми сайты – «МВД Медиа» порталы — Украинадағы соғысқа (Ресейде бұл «СВО» деп аталады) қатысып, ауыр жарақат алған Қазақстан азаматына ресейлік паспорт берілгенін жариялады.
«Қиын жағдайды ескере отырып, Солтүстік Осетия-Аланиядағы миграция басқармасының қызметкерлері азаматтық рәсімін барынша жедел аяқтады. Осылайша, СВО қатысушысы үшін өмірлік маңызды мәселе шешілді», — деді ІІМ ресми өкілі Ирина Волк.
Паспорт алған азаматтың аты-жөні аталған жоқ.
Айта кетерлігі, бұл жаңалық ІІМ сайтының басты бетінде Қазақстанға қатысты тағы екі хабармен қатар жарияланған. Олар Ресей ІІМ басшысы Владимир Колокольцевтің Өскеменге сапары мен ҚР ІІМ басшысы Ержан Сәденовпен кездесуіне арналған.
Қазақстан заңнамасына сәйкес, шет мемлекеттердің қарулы қақтығыстарына қатысу — қылмыстық әрекет. Бұл үшін Қылмыстық кодексте «Шетелдегі қарулы қақтығыстарға қатысу» және «Жалақы үшін соғысқа жалдану» баптары қарастырылған. Бұдан бөлек, Қазақстанда қос азаматтыққа заңмен тыйым салынған.