RUS
SMARTNEWS.KZ басылымының хабарлауынша, Қазақстан Үкіметі медицина қызметкерлеріне қарсы күш қолданғандарды қатаң жазаға тартуды көздейтін заң жобасын дайындады.
Қылмыстық кодекске жаңа бап енгізілмек. Ол бойынша екі түрлі жаза қарастырылып отыр — бостандығын шектеу және бас бостандығынан айыру.
«Егер медициналық қызметкерге күш қолдану қаупі төнсе, және бұл дәлелденсе, кінәлі адамға екі жылға дейін бостандығын шектеу жазасы беріледі. Ал нақты күш қолдану фактісі тіркелсе — бұл екі жылдан жеті жылға дейін бас бостандығынан айыруға әкеледі. Егер бұл төтенше жағдай кезінде орын алса — он жылға дейін, ал егер шабуыл бір немесе бірнеше адамның қатысуымен топтық сипат алса — он бес жылға дейін бас бостандығынан айырылады», — деді Денсаулық сақтау министрі Ақмарал Әлназарова Үкімет отырысындағы баспасөз мәслихатында.
Министрдің айтуынша, бұл шаралар — медицина қызметкерлерінің қауіпсіздігін қамтамасыз етудегі әділ және орынды қадам. Аталған түзетулерді Парламентке қыркүйек айында енгізу жоспарланып отыр.
Соңғы уақытта Қазақстанда дәрігерлерге шабуыл жасау фактілері жиілеген. Соңғы бір айда бірнеше резонансты жағдай тіркелген. Қостанайда науқас хирургті ұрып, дәрігер бірнеше күн ес-түссіз жатқан. Ал Қарағандыда ер адам маммологиялық орталықтың медбикесін қатыгездікпен соққыға жыққан.