RUS
SMARTNEWS.KZ басылымының хабарлауынша, Қазақстандық самбошы, ардагер спортшы Айсара Керімбекованың көшеде жұмыс істеуге мәжбүр болғаны қоғамда резонанс тудырды. Бұл жағдайға байланысты Туризм және спорт министрі Ербол Мырзабосынов ашық пікір білдіріп, Самбо федерациясын сынға алды. Бұл туралы 1Bol.kz жазды.
Министрдің айтуынша, мемлекет бүгінге дейін 100-ден аса спорттық федерацияға қаржы бөлген. Соған қарамастан, белгілі спортшының әлеуметтік жағдайы ескерусіз қалған.
«Ел намысын қорғап, абырой әперген апамыздың осындай күй кешуі – ұят. Бұл жағдай анықталғанына бір айдан асты, бірақ федерация тарапынан нақты әрекет байқалмайды. Самбо федерациясының басшылары қайда? Алматы қалалық спорт басқармасының өкілдері неге үнсіз?» – деді Мырзабосынов.
Ол сондай-ақ федерациялар тек жарыс ұйымдастырумен шектеліп қалмай, өңірлерді аралап, ардагер спортшылармен жұмыс істеу қажет екенін айтты.
«Федерация өкілдері аймақтарға барып, жаттығу әдістемесін әзірлесін. Егер олар мұнымен айналыспаса, ондай ұйымдардың қажеті жоқ. Ардагер спортшылар көп емес – олардың тәжірибесі мен еңбегі ескерусіз қалмауы тиіс», – деп түйіндеді министр.
Айта кетейік, Айсара Керімбекова – самбодан әлем чемпионатының екі дүркін (1988, 1992) күміс жүлдегері, КСРО кубогінің (1989) күміс жүлдегері, КСРО халықтары спартакиадасының қола жүлдегері (1991), Азия чемпионы (1992), Азия чемпионатының екі дүркін қола жүлдегері. Желілерде Айсара Керімбекованың 20 жылдан астам уақыт бойы аула сыпырып жүргені айтылып, федерацияның чемпионды қараусыз қалдырғаны сынға қалған.