RUS
SMARTNEWS.KZ басылымының хабарлауынша, Украина президенті Владимир Зеленский 24 шілде күні жемқорлыққа қарсы күреске бағытталған жаңа заң жобасын Жоғарғы Радаға ұсынды. Бұл шешім бұған дейін қабылданған заңға қарсы елде басталған жаппай наразылықтарға жауап ретінде қабылданды.
Бұған дейін Раданың мақұлдауынан өткен құжатта Ұлттық жемқорлыққа қарсы бюро (ҰЖҚБ) мен Арнайы жемқорлыққа қарсы прокуратураның (АЖҚП) Украина Бас прокурорының бақылауына берілуі қарастырылған еді. Бұл өзгеріс елдегі антикоррупциялық құрылымдардың тәуелсіздігіне нұқсан келтіреді деп саналған. Осыған байланысты мыңдаған украин азаматы Киев көшелеріне шығып, өз наразылықтарын білдірді. Бұл шерулер Ресейдің кең ауқымды басып кіруінен кейінгі ең ірі халықтық толқулардың бірі болып отыр.
Президент Зеленский жаңа заң жобасында аталған мекемелердің Бас прокуратураға бағынуын алып тастап, олардың тәуелсіздігін сақтауға уәде берді. Ол заңның қайта түзетілген нұсқасы «құқықтық жүйені нақты күшейтіп», «жемқорлыққа қарсы органдардың толық дербестігін қамтамасыз ететінін» мәлімдеді.
Еуропалық Одақ та жағдайға алаңдаушылық білдірді. Кеңейту жөніндегі ЕО комиссары Марта Кос қабылданған заңды «артқа шегіну» деп бағалап, ҰЖҚБ мен АЖҚП-ның дербестігі Украина үшін ЕО-ға мүше болу жолындағы басты шарт екенін еске салды.
Transparency International ұйымының Украинадағы бөлімшесі де бұл заң парламенттің беделіне нұқсан келтіріп, халықаралық серіктестердің сеніміне сызат түсіретінін ескертті.