RUS
SMARTNEWS.KZ басылымының хабарлауынша, Астанада Қазақстан мен Мажарстан арасындағы стратегиялық серіктестікті тереңдету мәселелері талқыланды.
Қазақстан Сыртқы істер министрінің орынбасары Арман Исетов Мажарстанның еліміздегі Елшісі Отто Иван Ронамен кездесті. Жиында тараптар екіжақты саяси диалогты жандандыру, сауда-экономикалық байланыстарды кеңейту және мәдени-гуманитарлық ынтымақтастықты тереңдету жолдарын сөз етті.
Сұхбат барысында көлік, білім беру, мәдениет салаларындағы бірлескен бастамалар және жоғары деңгейдегі сапарлар аясында қол жеткізілген уағдаластықтарды жүзеге асыру жайы талқыланды.
Арман Исетов Мажарстанды Еуропалық одақтағы Қазақстанның сенімді әрі жақын серіктесі ретінде бағалайтынын айтып, Астана мен Будапешт арасындағы тұрақты саяси диалогтың маңызын атап өтті.
— Екі ел арасындағы достықтың негізінде ортақ тарихи және мәдени тамыр жатыр. Бұл ынтымақтастықты одан әрі тереңдетуге мүмкіндік береді, — деді ол.
Кездесу соңында Арман Исетов елшіге атқарылып жатқан белсенді жұмысы үшін алғыс білдіріп, қазақ-мажар байланысы жаңа серпінмен дами беретініне сенім білдірді.