RUS
SMARTNEWS.KZ басылымының хабарлауынша, Украина президенті Владимир Зеленский елде дау туғызған антикоррупциялық құрылымдарды әлсірету туралы заңды кері қайтаруға шешім қабылдады. Ол Жоғарғы Радаға Ұлттық антикоррупциялық бюро (ҰАБ) мен Арнайы антикоррупциялық прокуратураның (ААП) бұрынғы өкілеттерін қалпына келтіретін жаңа заң жобасын ұсынды.
Бұл шешім қоғамдағы қысым мен 2022 жылдан бері болмаған ауқымды халық наразылығынан кейін қабылданды.
Зеленский бұл құжат «әділдік орнату үшін» әзірленгенін айтып, оның мақсаты — антикоррупциялық құрылымдардың тәуелсіздігін нақты кепілдендіру, сондай-ақ Ресей ықпалына жол бермеу екенін атап өтті. Жаңа заң жобасында сала қызметкерлерін полиграфтан жүйелі өткізу секілді жемқорлыққа қарсы нақты тетіктер қарастырылған.
Батыс елдері егер Украина антикоррупциялық құрылымдарды әлсіретсе, қаржылық және саяси қолдаудан айыратынын ескерткен болатын.
Белсенділер мен құқық қорғаушылар бұған дейін қабылданған заңның астарында Зеленскийдің айналасындағы адамдарға қатысты жүргізілген тергеулерді тоқтату әрекеті жатқанын мәлімдеген.