«Шапағат медалінен айыру, мүлкін тәркілеу, түрмеге тоғыту»: Перизат Қайрат пен анасына сот шешім шығарды

SMARTNEWS.KZ басылымының хабарлауынша, Астанадағы қылмыстық істер жөніндегі мамандандырылған ауданаралық сот атышулы қайырымдылықпен айналысқан Перизат Қайрат пен оның анасы Ғайни Алашбаеваға үкім шығарды. Оларды аса ірі көлемдегі алаяқтық пен заңсыз табысты жасыру бойынша кінәлі деп таныды.

Сот төрағасы Сабыржан Каримовтың үкіміне сәйкес, Перизат Қайрат:

ҚР ҚК 190-бабы 4-бөлімінің 2-тармағы (Алаяқтық) және

218-баптың 3-бөлімінің 3-тармағы (Криминалдық кірісті заңдастыру, аса ірі көлемде) бойынша айыпты деп танылды.

Оған 10 жыл бас бостандығынан айыру, мүлкін тәркілеу және қайырымдылықпен айналысуға 10 жыл тыйым салу жазасы тағайындалды. Сонымен қатар, сот шешімімен Перизат Қайрат «Шапағат» медалінен айырылды.

Ал анасы, Ғайни Алашбаева, 7 жылға сотталып, оған да қайырымдылық және қаржы жинау қызметімен айналысуға 10 жылға тыйым салынды. Оның да мүлкі мемлекет пайдасына тәркіленді.

Тергеу материалдарына сәйкес, ана мен қызы ел тұрғындарының сенімін теріс пайдалана отырып, 3 миллиард 545 миллион 897 мың 507 теңгені иемденген. Бұл қаржы қайырымдылық желеуімен жиналған.

Сот тәркілеген мүліктерді жәбірленушілерге келтірілген зиянды өтеу үшін пайдалануға шешім шығарды. Жәбірленушілер қатарында — Қазақстандағы ірі қаржы ұйымдары:

• Forte Bank,

• Alatau City Bank (бұрынғы Jusan Bank),

• Kaspi.kz финтех-компаниясы бар.