RUS
SMARTNEWS.KZ басылымының хабарлауынша, Қазақстанда 2012 жылы жасалған ауыр қылмысқа қатысы бар күдікті Қырғызстанда қолға түсті. Бұл туралы Бас прокуратура ресми мәлімдеді.
Тергеу мәліметтеріне сәйкес, 2012 жылы жеті ер адам екі жас қызды кездесуге шақырып, олардың сусынына клофелин қосып, есінен тандырған. Артынша жәбірленушілерді топтасып зорлаған. Оқиғадан кейін қылмысқа қатысы бар бірнеше адам түрлі мерзімге сотталса, біреуі елден қашып кетіп, халықаралық іздеуге жарияланған.
13 жыл бойы жасырынып келген күдікті 2025 жылдың сәуірінде Бішкек қаласында ұсталды. Қазақстанның Бас прокуратурасының сұрауы бойынша Қырғызстан билігі оны экстрадициялап, елге қайтарды.
Қазір күдікті уақытша ұстау изоляторында отыр. Қылмыстық кодекске сәйкес, мұндай қылмыс үшін 5 жылдан 10 жылға дейін бас бостандығынан айыру жазасы қарастырылған.