RUS
SMARTNEWS.KZ басылымының хабарлауынша, Аустрияның сыртқы істер министрі Беате Майнль-Райзингер АҚШ президенті Дональд Трамптың Украинаға қатысты ұстанымын қатаң сынға алды. Оның сөзінше, Трамп Ресей президенті Владимир Путинге Қырым мен Украинаның шығыс облыстарының бір бөлігін «табаққа салып берді». Сонымен қатар, ол Украинаға НАТО-ға кіру мүмкіндігін жоққа шығарды.
«Егер Путин шынымен бейбітшілікті қаласа, атысты тоқтату жөнінде келіссөзді дәл қазір бастар еді. Украина бейбіт өмірге ұмтылады, ал Ресей олай емес», — деді министр Die Welt басылымына берген сұхбатында.
Майнль-Райзингер Ресейдегі экономикалық жағдайды «апатты» деп бағалап, Мәскеуге соғысты жалғастыру барған сайын қиындай түскенін айтты.
Айта кетейік, 23 шілде күні Стамбулда Ресей мен Украина арасындағы келіссөздердің үшінші раунды өтті. Келіссөздерде соғыс тұтқындарын қайта алмастыру және Ресейге әкетілген украиналық балаларды қайтару мәселелері талқыланды. Украина тамыз айының соңына дейін Путин мен Зеленскийдің тікелей кездесуін өткізуді ұсынды. Алайда Кремль мұндай кездесуге дейін Мәскеу мен Киевтің ұстанымдарын жақындату қажет екенін айтып, әлі де үлкен дайындық жұмыстары күтіп тұрғанын мәлімдеді.