RUS
SMARTNEWS.KZ басылымының хабарлауынша, 28 шілде күні Ресейдің ұлттық әуе тасымалдаушысы «Аэрофлот» компаниясының ақпараттық жүйесінде ауқымды ақау тіркеліп, Мәскеуден ұшуға тиіс 49 рейс тоқтатылды. Компания бұл техникалық ақау туралы өзінің Telegram-арнасында хабарлады.
«Аэрофлот» жолаушыларға рейстердің кешігуі немесе мүлде ұшпай қалуы мүмкін екенін ескертіп, мамандар мәселені жедел шешуге кіріскенін мәлімдеді.
Көп ұзамай Silent Crow атты хакерлік топ беларусьтік «Киберпартизаны BY» тобымен бірігіп, «Аэрофлоттың» бүкіл IT-инфрақұрылымын «толықтай жойып, бұзғанын» хабарлады. Олардың айтуынша, хакерлер компанияның ішкі желісінде бір жылдай уақыт бойы бақылаусыз жүрген.
«Біз барлық деректер базасын жүктеп алдық, маңызды корпоративтік жүйелерді бұздық, тіпті басшылықтың да компьютерлеріне қол жеткіздік», — деп мәлімдеді хакерлер.
Ресейдің Бас прокуратурасы да бұл ақпаратты растады. Ведомствоның мәліметінше, тексерістен кейін заңсыз компьютерлік ақпаратқа қол жеткізу бойынша Қылмыстық кодекстің 272-бабы аясында іс қозғалған.
Шабуылдың салдарынан Мәскеудегі Шереметьево әуежайында ұзын-сонар кезек пайда болды. Компания баспасөз қызметі 49 рейстің тоқтатылғанын растады. Жолаушылардан багаждарын алып, ақшаларын қайтарып алуға немесе билеттерін басқа күнге ауыстыруға кеңес берілді.
Кейінірек Ресей Көлік министрлігі, «Аэрофлот» және «Росавиация» бірлесіп, жолаушылардың бір бөлігін «Россия» және «Победа» әуе компанияларының рейстеріне орналастыруға тырысып жатқандарын мәлімдеді.