Алматы облысында 13 жастағы қызды дәрі беріп зорлаған

SMARTNEWS.KZ басылымының хабарлауынша, Алматы облысы Қаскелең қаласында 13 жастағы қыз зорланды. Бұл туралы «НеМолчиKZ» қоры мәлім етті.

Қордың мәліметінше, оқиға 23 шілде күні болған. Қыз кешкісін серуендеуге шығып, үйіне оралмаған. Туыстары оны түні бойы іздеп, таңертең Қаскелеңдегі қонақүйлердің бірінен тапқан. Қыздың зорланғаны анықталған.

Жәбірленушінің туыстары полиция қызметкерлерінің әрекетіне шағымданды. Олардың айтуынша, қыз табылғаннан кейін де оны іздеуден ресми түрде шығармаған. Прокуратура өкілі, кезекші адвокат және психолог шақырылмаған. Сот-медициналық сараптама жүргізілгенімен, қыздың киімінен және қанынан сынама алынбаған.

Туыстары тергеу барысында полицияның жәбірленуші мен анасын күдікті ретінде тергегенін мәлім етті. Сондай-ақ олар қызға қысым көрсетілгенін айтады.

Олардың айтуынша, күдікті 19 жастағы азамат. Жәбірленуші онымен таныс емес. Ол өзін 16 жастамын деп таныстырып, қонақүйге алдап кіргізген. Қыздың әпкесінің сөзінше, күдікті сусынына есірткі қосқан болуы мүмкін.

Сонымен қатар, полиция қыздың анасынан оқиға туралы ақпарат таратпау туралы қолхат алған. Жәбірленушінің туыстары істің жабылып қалуынан қауіптеніп отыр.

Алматы облыстық полиция департаменті оқиғаға қатысты әзірге ресми түсініктеме берген жоқ.