RUS
SMARTNEWS.KZ басылымының хабарлауынша, Kaspi Travel арқылы әуе билетін сатып алған қазақстандық бойжеткен қарапайым қателікке жол беріп, 24 миллион теңгеге жуық айыппұл төлеуге мәжбүр бола жаздады. Оқиға туралы ол Instagram желісіндегі парақшасында бөлісті.
Қыздың айтуынша, 17 шілде күні ол билет сатып алып жатып, ұшу күнін қате көрсетіп қойған. Қателікті бірден аңғарып, Kaspi Гид арқылы техникалық қолдау қызметіне жүгінген. Алайда, оған жіберілген жауап естен тандырды: $107 тұратын билетті қайта рәсімдеу үшін $44 123 (шамамен 24 млн теңге) көлемінде айыппұл төлеу қажет екені айтылған.
«Бес күн ішінде бес түрлі операторға жаздым. Бірі сөйлесіп жатып үзіп тастайды, бірі мүлде жауап бермейді. Тек бірнеше күннен соң Ольга есімді оператор жағдайға түсіністікпен қарап, басшылыққа шағым жолдады. Бірақ әлі күнге дейін жауап жоқ», – деп жазды бойжеткен.
Жағдайдың оғаштығы сол – әуе компаниясының ресми сайтында билет ауыстыру құны бар болғаны $18 деп көрсетілген. Яғни Kaspi Travel көрсеткен сомамен арада мың есе айырмашылық бар.
Instagram-да бұл жазба әлеуметтік желілерде үлкен резонанс туғызып, қолданушылар Kaspi Travel-ден ресми түсініктеме талап етуде. Көпшілік бұл жағдайды «цифрлық жүйедегі ақау» немесе «техникалық қателік» деп болжауда.
Kaspi.kz әзірге бұл жағдайға ешқандай пікір білдірген жоқ.