RUS
SMARTNEWS.KZ басылымының хабарлауынша, OpenAI бас директоры Сэм Альтман ChatGPT-пен болған сұхбаттар сот шешімі бойынша жария етілуі мүмкін екенін мәлімдеді. Бұл туралы ол шетелдік БАҚ-қа берген сұхбатында айтты.
Альтманның сөзінше, соңғы уақытта адамдар ChatGPT-ті психотерапевт, лайф-коуч немесе жеке кеңесші ретінде жиі пайдалана бастаған. Алайда бұл әңгімелер дәрігерлік құпиямен қорғалмайды және соттың талабы бойынша ашылуы мүмкін.
«Егер сіз өзіңіздің ең құпия нәрселеріңізді ChatGPT-ке айтып, кейін қандай да бір сот ісі туындаса, бізден ол жазбаларды ұсыну талап етілуі мүмкін», — деді Альтман.
Сонымен қатар, ол жасанды интеллектпен болған диалогтар да психотерапевтпен әңгіме секілді құпиялықпен қорғалуы керек деген пікірін білдірді. Оның айтуынша, бұл құқықтық ұстаным мүмкіндігінше тезірек енгізілуі тиіс.
OpenAI ережелеріне сәйкес, пайдаланушылардың жойылған чаттары 30 күн ішінде толығымен өшіріледі. Бірақ заң талаптары немесе қауіпсіздік себептері болған жағдайда, компания оларды сақтап қалуы мүмкін.