RUS
SMARTNEWS.KZ басылымының хабарлауынша, Атырау облысы Исатай ауданына қарасты Арқар ауылында 27 шілдеде түйенің құтыру ауруына шалдығуы мүмкін деген күдік тіркелді.
Облыстық ауыл шаруашылығы және жер қатынастары басқармасының мәліметінше, клиникалық белгілеріне қарап, мал құтыруға шалдықты деген күдікпен оқшауланған. Қазір ол ветеринар мамандардың бақылауында.
Сонымен қатар, Арқар ауылы эпизоотикалық қадағалауға алынды.
Жергілікті тұрғындардың айтуынша, Исатай ауданының өзге ауылдарында да түйелер аяқ астынан құлап, бірден өліп қалу жағдайлары жиілеген.
Еске салайық, бұған дейін Құрманғазы ауданында да түйелер жаппай ауырып, 204 түйе зардап шеккені хабарланған. Оның ішінде:
84-і өлген,
73-і жазылып шыққан,
47-сі ем қабылдап жатыр.
Қауіпті инфекциялар – сібір жарасы мен бруцеллёзге алынған сынамалар теріс нәтиже көрсеткен.
Аурудың нақты себебін анықтау үшін өңірдегі мамандар Биологиялық қауіпсіздік проблемалары ғылыми-зерттеу институты мен Қазақ ветеринария ғылыми-зерттеу институтынан ғылыми кеңес сұратты. Мамандар ықтимал себептер ретінде:
жәндіктер шағуын,
паразиттік ауруларды,
токсиндік әсерлерді атап отыр.
Қазіргі таңда жағдай ветеринарлық қызметтің ерекше бақылауында.