RUS
SMARTNEWS.KZ басылымының хабарлауынша, АҚШ президенті Дональд Трамп жұбайы Мелания Трамптың Ресей басшысы Владимир Путинге оң көзқараста екенін айтты. Бұл туралы ол Pod Force One подкастында мәлімдеді.
«Біз Путинді танимыз. Оған (Меланияға — ред.) Путин ұнайды. Маған да. Мен онымен өте жақсы қарым-қатынаста болдым», — деді Трамп.
Алайда ол Ресейдің Украина аумағына жасаған шабуылдарына байланысты Путинге қатысты көзқарасының өзгергенін тағы да қайталап айтты.
Шілде айында The Times басылымы жариялаған мақалада Мелания Трамптың күйеуінің саяси шешімдеріне ықпалы жеткілікті болуы мүмкін екені жазылған.
Дональд Трамп кейінірек Мелания тек «қан төгілмесін» деп қана тілейтінін алға тартты. Ал АҚШ Конгресі өкілі, республикалық партия мүшесі Дон Бэконның айтуынша, Трамптың Украина мәселесіндегі ұстанымы жұбайының ықпалымен өзгерген.
Айта кетейік, кеше АҚШ президенті Ресейге соғысты тоқтату үшін 10 күн мерзім берді. Ол Стамбулда өтіп жатқан Ресей мен Украина арасындағы келіссөздерде ешқандай ілгерілеу жоқтығына наразылығын білдірді.