RUS
SMARTNEWS.KZ басылымының хабарлауынша, Тәжікстанның Ішкі істер министрлігі Турсунзаде қаласының 40 жастағы тұрғыны өз ұлын ұрып-соғып өлтірді деген күдікпен ұсталғанын хабарлады.
Оқиға 2025 жылғы 26 шілдеде болған. Полицияның мәліметінше, ер адам 15 жастағы ұлын ақша ұрлады деп күдіктенген: мамыр айында – 800 сомони, шілдеде – 600 сомони жоғалған.
Күдікті баласын мойындату үшін «Тико» көлігіне отырғызып, Турсунзаде қаласындағы Навобод жамоаты аумағына алып кеткен. Сол жерде баланың аяғына шамамен екі метрлік сым байлап, екінші ұшын көлігіне бекітіп, 100 метрге жуық сүйреткен.
Жасөспірім алған ауыр жарақаттарынан кейін үйінде көз жұмған.
Қазір күдіктіге Қылмыстық кодекстің 110-бабы 3-бөлігі («Денсаулыққа қасақана ауыр зиян келтіру, абайсызда адам өліміне соқтырған жағдай») бойынша іс қозғалды. Тергеу амалдары жалғасып жатыр. ІІМ баланың аты-жөнін жариялаған жоқ.
Алайда «Озоди» радиосының дерегінше, марқұмның аты — Хисрав Одинаев, ал әкесі — Назари Парвиз Одинаев.
Asia-Plus басылымының ақпарат көзі ер адамның баланы бірнеше күн бұрын насыбай қолданғаны үшін ұрғанын хабарлаған. Келесі күні жасөспірім үйден қашып кетіп, әкесінің тағы 600 сомониін алып, Душанбеге — әпкесінің үйіне барған.
Бірақ кейін әпкесі баланың әкесіне хабарласып, оны үйден алып кетуін сұраған. Баланы алып келе жатқан жолда күдікті оны көлікке байлап, жермен сүйретіп, артынша азаптап, камераға түсіріп, ақша мен насыбайға қатысты сұрақтар қойған. Жасөспірім ақша жұмсағанын мойындаған, бірақ насыбай қолданбағанын айтқан.
Осыдан кейін ер адам ұлын үйдің жертөлесіне жауып қойған. Анасы мен басқа балалар болғанымен, олар баланың жағдайын біле алмаған — ер адам жақындарын жертөлеге жолатпапты.
Келесі күні таңертең ер адам ұлының жағдайы нашарлағанын байқап, жергілікті дәрігерді шақырған. Дәрігер келгенде баланың қайтыс болғанын анықтаған. Оқиғаны жасыру үшін ата-анасы баланың денесін жуып, туған ауылдары — Балджувонға жерлеуге апармақ болған, алайда жолда полиция оларды ұстап үлгерген.
Қазір күдікті қамауда отыр.