RUS
SMARTNEWS.KZ басылымының хабарлауынша, Катар, Сауд Арабиясы мен Мысыр бастаған бірқатар араб елдері ХАМАС қозғалысын Газа секторынан кетіп, қару-жарағын Палестина автономиясына тапсыруға шақырды. Бұл үндеу Нью-Йоркте өткен екі мемлекет формуласы туралы халықаралық конференция барысында жасалды.
Палестина автономиясының премьер-министрі Мұхаммед Мұстафа форум мінберінен сөйлеп, халықаралық бейбітшілік күштерін аймаққа шақыруға дайын екенін жеткізді. Оның айтуынша, бұл қадам Газа секторын қалпына келтіру мен бейбіт өмірді қамтамасыз етуге бағытталған.
Еуропалық одақ пен Араб мемлекеттері лигасы жеті беттен тұратын арнайы декларацияны қолдап, оны Біріккен Ұлттар Ұйымы қыркүйекке дейін ресми түрде бекітеді деп күтілуде. Бұл бастамаға басқа елдердің де қосылу мүмкіндігі бар.
Францияның Еуропа істері жөніндегі министрі Жан-Ноэль Барро қабылданған құжатты «тарихи және бұрын-соңды болмаған» шешім деп атады. Конференция барысында 15 батыс елі, Франция жетекшілігімен, Палестинаны тәуелсіз мемлекет ретінде мойындауға үндеді.
Сонымен қатар, құжатта ХАМАС-тан Израиль азаматтарын тұтқыннан босату талап етілген. Қатысушы елдер Газа секторындағы ауыр гуманитарлық жағдайға алаңдап, соғысты тоқтатуға үндеді. Бұл қақтығыс екі жылдан бері жалғасып келеді.
Айта кетейік, АҚШ пен Израиль бұл конференцияны бойкоттады. Олар қазіргі жағдайда Палестина мемлекетінің құрылуын террорды қолдау деп бағалайды.