RUS
SMARTNEWS.KZ басылымының хабарлауынша, 30 шілде күні күндіз Әл-Фараби атындағы Қазақ ұлттық университетінің ректорлық ғимаратында қайғылы жағдай болды — Шығыстану факультетінің 1-курс студенті 14-қабаттан секіріп мерт болды. Бұл туралы Orda.kz жазды.
Алдын ала мәлімет бойынша, марқұм түркология мамандығы бойынша білім алып жүрген. Қайғылы оқиғаға отбасылық қиындықтар себеп болуы мүмкін екенін Алматы қалалық ПД растады. Қазір Бостандық аудандық полиция басқармасы бұл дерек бойынша қылмыстық іс қозғап, оқиғаның мән-жайын анықтап жатыр.
Бейресми ақпаратқа сәйкес, студент оқудан шығып қалу қаупі немесе оқу ақысын төлеу мүмкіндігінің болмауы салдарынан осындай шешім қабылдауы ықтимал.
«Орда» дереккөзі хабарлауынша, университет әкімшілігі қызметкерлердің телефондарына тексеру жүргізіп, оқиға орнынан сурет пен видеолардың таралмауын қадағалаған.
«Сағат 18:00-ге дейін ректорлық ғимараттың есіктері іштен жабық болды, ешкімді кіргізбеді. Қызметкерлердің телефондары тексерілді», — деді дереккөз.
Еске сала кетейік, 2024 жылдың маусымында ҚазҰУ маңындағы субұрқақта талапкер ток соғып қаза тапқан еді. Ол кезде университет балансына тиесілі гидротехникалық нысан үшін қала билігі жауапты екенін айтқан. Ал Білім министрі Саясат Нұрбек марқұмның фонтанға не үшін кіргенін түсінбейтінін жеткізген болатын.