RUS
SMARTNEWS.KZ басылымының хабарлауынша, Астанадағы балалар ойын-сауық орталықтарының бірінде 4 жастағы бала алаңқайда ойнап жүріп ауыр жарақат алды. Бүлдіршіннің бірнеше қол сүйегі сынып, сіңіріне дейін жеткен жарақат алған.
Туыстарының айтуынша, оқиға осыдан төрт ай бұрын болған, алайда ешкім жауапқа тартылмаған. Анасының сөзінше, бала арнайы ойын платформасында ойнап жатқан сәтте жарақат алып, шұғыл операция жасалған. Кейін жара инфекцияға ұшырап, 27 наурызда екінші рет наркоз арқылы хирургиялық өңдеу жүргізілген.
Оқиғаға қатысты балалар орталығының әкімшілігі түсініктеме беріп, оқиғаның болғанын растады. Олар барлық ойын жабдықтары Еуразиялық экономикалық одақтың 042/2016 ТР «Аттракциондардың қауіпсіздігі туралы» техникалық регламентіне сай сертификатталғанын мәлімдеді.
«Біз бірден баланың ата-анасымен байланыс орнатып, көмектесуге тырыстық. Емдеу шығындарын өтеуге, баланың толық айығуына дейін қолдау көрсетуге дайын болдық. Бірақ біраз уақыттан кейін ата-анасы бізбен байланысудан бас тартып, қоғам алдында айыптауға көшті. Алайда біздің тарапымыздан ешқандай бейқамдық болған жоқ. Медициналық анықтамалар мен нақты ем-дом шығындары бізге ұсынылмады», – деді орталық әкімшілігі.
Астана қалалық полиция департаменті оқиғаға байланысты қылмыстық іс қозғалғанын растады.
«Қазіргі уақытта бейнебақылау жазбалары зерттеліп, сот-медициналық сараптамалартағайындалды. Оның нәтижесіне сай заң аясында шешім қабылданады. Сонымен қатар ойын алаңының басшылығына және жергілікті атқарушы органдарға жарақат алуға себеп болған жағдайларды жою туралы ұйғарым жолданды», – деді полиция өкілі.
Полиция ойын-сауық нысандарының иелеріне қауіпсіздік талаптарын қатаң сақтау қажет екенін ескертті. Балаға ауыр жарақат әкелген немқұрайдылық үшін заң жүзінде жауапкершілік қарастырылған.