RUS
SMARTNEWS.KZ басылымының хабарлауынша, Астанада өткен Үкімет кулуарында Қазақстанның көлік министрі Нұрлан Сауранбаев бес жыл бұрын болған Bek Air ұшағының апатына қатысты тергеу аяқталып, қылмыстық іс сотқа берілгенін растады.
«Қылмыстық іс аясындағы негізгі тергеу ресми түрде аяқталды», – деді министр Үкімет отырысынан кейін журналистер сұрағына жауап беріп.
Оның айтуынша, бұл резонансты іске қатысты қоғамда әлі де көп сұрақ бар, сондықтан министрлік қызметтік тергеуді қайта бастаған.
«Қоғам тарапынан, журналистер тарапынан көптеген сұрақтар түсіп жатыр. Сондықтан біз өз ішімізде қосымша қызметтік тексеріс жүргізіп жатырмыз. Егер қосымша деректер анықталса, оны басқа да құзырлы органдарға жолдаймыз», – деді ол.
Еске салайық, Bek Air компаниясының Z9-2100 рейсімен ұшқан Fokker-100 ұшағы 2019 жылдың желтоқсанында Алматы маңында апатқа ұшырап, 12 адам қаза тапқан еді. Бұл – еліміздегі соңғы ірі әуе апаттарының бірі.
Апаттан кейін Bek Air-дің жұмысы тоқтатылып, лоукостер лицензиясынан айырылған. Қазір бұл компания туралы көпшілік ұмыта бастағанымен, ұшақ апатының себептері мен салдарына қатысты сұрақтар әлі де өзекті.