RUS
SMARTNEWS.KZ басылымының хабарлауынша, АҚШ президенті Дональд Трамптың екінші президенттік мерзімі аяқталғанға дейін Америка Құрама Штаттары Айға адам қондыруды жоспарлап отыр. Бұл туралы NASA басшысы міндетін атқарушы әрі АҚШ-тың көлік министрі Шон Даффи Fox News арнасына берген сұхбатында айтты.
«Бұл миссия Трамптың президенттігі кезінде жүзеге асады», – деді ол.
Даффидің айтуынша, 2026 жылы Айға қонатын экипаж NASA-ның Artemis бағдарламасы аясында жіберіледі. Бұл – Марсқа ұшуға дайындықтың маңызды кезеңі. Ал 2026 жылдың басында экипаж мүшелері қатысатын алғашқы ұшу – Айды айналып ұшатын миссия — жүзеге асады.
NASA Айда тұрақты база салуды жоспарлап отыр. Мекеме өкілдері бұл база кейінгі Марсқа сапарға дайындық үшін қажет болады деп санайды.
«Біз Айда тұрақтаймыз. Сол жерде жиналған тәжірибе мен білім бізге Қызыл планетаға жетуге мүмкіндік береді», – деді Даффи.
Айта кетейік, Artemis бағдарламасы 2019 жылы басталған. Алғашқы кезеңінде — 2022 жылы — Orion кемесімен Айды автоматты режимде айналып ұшу жүзеге асты. Енді Artemis II миссиясы аясында Айды экипажбен айналып шығу көзделіп отыр. Ал негізгі кезең — Artemis III — Айға нақты қонумен аяқталуы тиіс.
Бұған дейін қондыру 2024 жылға жоспарланған болатын, алайда дайындық пен қауіпсіздік талаптарына байланысты ол 2027 жылдың ортасына шегерілген еді.
Тағы бір ерекшелік: Artemis III миссиясы кезінде NASA астронавтары алғаш рет Prada сән үйі жасаған скафандрлармен Ай бетіне қонады. Итальяндық сән бренді Axiom Space компаниясымен бірігіп, заманауи әрі төтенше ғарыштық жағдайларға төтеп бере алатын жабдық әзірлеп жатыр.