RUS
SMARTNEWS.KZ басылымының хабарлауынша, Қазақстан Үкіметі Көкшетау, Семей және Өскемен қалаларында жылу электр станцияларын ресейлік қатысусыз салу туралы шешім қабылдады. Бұл туралы Премьер-министрдің бірінші орынбасары Роман Скляр бүгін, 31 шілдеде өткен баспасөз мәслихатында мәлімдеді.
Бұған дейін бұл жобаларды Ресейдің «Интер РАО» компаниясы жүзеге асыруы тиіс болған. Алайда Склярдың айтуынша, ресейлік тарап қажетті экспорттық қаржыландыруды қамтамасыз ете алмаған.
«Сондықтан бұл нысандарды Қазақстан өз күшімен салады. Мәселен, кеше Көкшетау жылу электр орталығының құрылысы қарқын алғаны туралы хабарланды. Бұл жобаның тапсырыс берушісі – “Самұрық-Энерго” компаниясы. Семей мен Өскеменде де дәл осындай схема қолданылады», – деді Скляр.
Сонымен бірге, ол ресейлік тараптан кейінірек қаржыландыру жөнінде ұсыныстар түссе, «Самұрық-Энерго» оларды серіктес ретінде қарастыруы мүмкін екенін атап өтті.
«Егер олардан ұсыныстар түссе, ешқандай шектеу жоқ – серіктестікке жол ашық», – деді Үкімет өкілі.
Станциялар қуаттылық нарығының ережелеріне сай салынып жатыр. Склярдың айтуынша, тарифтер қолданыстағы шектеулерден аспайды. Әзірге нақты есеп болмаса да, бір гигаватт қуат бірлігіне шаққанда орташа құны 2–2,5 млн доллар болуы мүмкін екенін айтты.
Инвесторлар кім болуы мүмкін?
Еске сала кетейік, биылғы 9 шілдеде Энергетика вице-министрі Бақытжан Ілиясов үш ЖЭО-ның құрылысына инвесторлар әлі де іздестіріліп жатқанын хабарлаған болатын. Ол Қытай мен Корея энергетикалық компанияларының қызығушылық танытып отырғанын айтқан.
Ал 15 шілдеде Премьер-министр Олжас Бектенов аталған жобалар мемлекет бюджетінен қосымша қаржы талап етпейтінін, яғни жеке инвестиция есебінен жүзеге асатынын мәлімдеген еді.