RUS
SMARTNEWS.KZ басылымының хабарлауынша, АҚШ президенті Дональд Трамп Канаданың Палестинаны тәуелсіз мемлекет ретінде мойындау ниетін сынға алып, бұл шешім екі ел арасындағы сауда келісіміне кедергі келтіруі мүмкін екенін мәлімдеді.
«Мәссаған! Канада Палестинаның тәуелсіздігін қолдайтынын мәлімдеді. Бұл біз үшін сауда келісімін жасау процесін едәуір қиындатады. Ой, Канада!», – деп жазды Трамп Truth Social желісінде.
Канаданың бұл қадамы туралы елдің премьер-министрі Марк Карни 28 шілденің кешінде мәлімдеген. Оның сөзінше, ресми мойындау қыркүйекте БҰҰ Бас Ассамблеясының сессиясында жариялануы тиіс.
Айта кетейік, бұған дейін Палестинаны тануға Франция президенті Эмманюэль Макрон мен Ұлыбритания премьер-министрі Кир Стармер де дайын екендерін білдірген.
Сауда келісімі неге бұлыңғыр?
Қазіргі таңда АҚШ Канададан әкелінетін бірқатар тауарға жоғары кедендік баж салығын қолданып отыр:
болат пен алюминийге – 50%,
автокөлік пен USMCA (АҚШ–Канада–Мексика) келісімінен тыс тауарларға – 25%,
мұнай, газ және калий тыңайтқыштарына – 10%.
Шілде айының басында Трамп егер тараптар 1 тамызға дейін жаңа келісімге келмесе, кейбір салаларға қосымша 35% көлемінде тариф енгізілетінін ескерткен.
Канада келісімді сақтағысы келеді
Канада мен АҚШ арасындағы келіссөздер шілде айының соңына қарай қарқынды кезеңге өтті. 29 шілдеде Канаданың АҚШ-пен сауда байланысына жауапты министрі Доминик Леблан елдің Вашингтонмен келісімге келуге мүдделі екенін мәлімдеді.
«Біз келісімді 1 тамызға дейін жасасамыз деп үміттенеміз. Қазір келіссөздер өте қарқынды жүріп жатыр», – деді ол.
Канадалық өнімдер АҚШ импортының 17,4 пайызын құрайды. Сондықтан да бұл келісім екі ел экономикасы үшін де маңызды болып отыр.