RUS
SMARTNEWS.KZ басылымының хабарлауынша, Жамбыл облысында жанармай құю бекетінде мотоцикл жүргізушісіне пышақпен шабуыл жасаған ер адам 11 жыл 3 айға бас бостандығынан айырылды. Бұл туралы облыстық сот мәлім етті.
Оқиға сәуір айында болған. Әлеуметтік желіде тараған бейнежазбада мотоцикл тізгіндеген ер адамның жанармай бекетіне жақындап келе жатқаны, оның артынан белгісіз бір ер адамның еріп жүргені байқалады. Бір сәтте ер адам қалтасынан пышаққа ұқсас зат шығарып, мотоцилистке бірнеше мәрте соққы жасайды.
Кейін ол ақ түсті автокөлікке отырып, оқиға орнынан із суытады. Бейнежазбада шабуылдың аяқ астынан болғаны, ал мотоцилистің мұндай әрекетті күтпегені анық көрінеді.
Жараланған азаматты полиция қорғауға алды. Ал оқиғаның өзі қоғамда үлкен резонанс тудырды.
Сот шешімі қандай болды?
Сотта анықталғандай, күдікті Ә. мотоцикл жүргізушісіне қасақана кісі өлтіру ниетімен, бұзақылық пиғылмен шабуылдаған. Ол жәбірленушінің арқа және кеуде тұсынан пышақпен екі рет ұрған. Алайда куәгерлердің араласуының арқасында қылмыс соңына дейін жүзеге аспаған.
Істің барлық мән-жайы куәгерлердің түсініктемелері, сараптама қорытындылары, оқиға орнындағы бейнежазба және басқа да айғақтар арқылы дәлелденген.
Прокурор айыпталушыға Қылмыстық кодекстің:
287-бабы 1-бөлігі (Суық қаруды заңсыз сақтау немесе өткізу) бойынша — 100 АЕК көлемінде айыппұл,
24-бап 3-бөлігі (Қылмысқа дайындалу және қылмысқа оқталу),
99-бап 2-бөлігінің 9-тармағы (Бұзақылық ниетпен адам өлтіруге оқталу) бойынша — 15 жылға бас бостандығынан айыру жазасын сұрады.
Жәбірленуші де қатаң жаза беруді талап етіп, моральдық зиян үшін 10 миллион теңге, ал материалдық шығын үшін 1,3 миллион теңге көлемінде өтемақы сұрады.
Сотта айыпталушы өз кінәсін мойындамағанымен, жасаған әрекетіне өкінетінін айтты.
«Сот үкімімен Ә. кінәлі деп танылып, жаза тағайындау кезінде жеңіл жаза ауыр жазаға сіңіріліп, оған түпкілікті 11 жыл 3 ай мерзімге бас бостандығынан айыру жазасы тағайындалды», – делінген сот хабарламасында.
Қазіргі таңда үкім заңды күшіне енген жоқ.