RUS
SMARTNEWS.KZ басылымының хабарлауынша, Астанада 60 жастағы ер адамның көпшілік жүретін саябақта тыр жалаңаш жүрген сәті видеоға түсіп, әлеуметтік желіде тарады.
Оқиға таңертеңгі уақытта болған. Куәгерлердің айтуынша, жалаңаш жүрген азамат Ұлттық теннис орталығы мен St. Regis қонақүйінің арасындағы жаяу жүргіншілер жолымен жүрген. Бұл — қала тұрғындары жиі өтетін аймақ, әрі жақын маңда балалар жаттығулары өтетін орындар бар.
Қалалық Полиция департаменті ер адамның жеке басы анықталғанын хабарлады.
«Аталған факті бойынша 60 жастағы ер адам ұсталды. Оған қатысты әкімшілік іс қозғалып, материалдар шешім қабылдау үшін сотқа жолданды. Құқық бұзушы уақытша ұстау изоляторына қамалды», — деп мәлімдеді Астана қалалық ПД баспасөз қызметі.
Полицейлер қоғамдық тәртіпті бұзғаны үшін заңда жауапкершілік қарастырылғанын ескертеді.
«Қоғамдық орындарда тәртіп сақтап, айналадағыларға құрметпен қарауға шақырамыз», — делінген хабарламада.
Ер адамның бұл әрекетке неге барғаны әзірге белгісіз.