RUS
SMARTNEWS.KZ басылымының хабарлауынша, 2025 жылдың алғашқы алты айында Ресейден экспортталған электр энергиясының негізгі бөлігі Қазақстан мен Қырғызстанға бағытталған. Бұл туралы ресейлік «Интер РАО» энергетикалық холдингінің жариялаған есебінде айтылды.
Мәліметке сәйкес, экспорт көлемінің 52%-ы дәл осы екі мемлекетке тиесілі, ал тағы 16%-ы Моңғолияның үлесіне тиген.
«2025 жылдың алғашқы жартысында Ресейден сыртқа шығарылған электр энергиясының 52 пайызы Қазақстан мен Қырғызстанға жөнелтілді. Тағы шамамен 16 пайызы Моңғолияға экспортталған», – делінген «Интер РАО» компаниясының хабарламасында.
Компания нақты қандай көлемде электр қуаты Қазақстан мен Қырғызстанға жіберілгенін ашып айтпаған. Дегенмен жалпы экспорт көлемі 3,075 миллиард киловатт-сағатты құрағаны белгілі.
Айта кетейік, «Интер РАО» бұған дейін Қазақстандағы үш жылу электр станциясының (ЖЭС) құрылысын жүргізетін негізгі мердігер ретінде ұсынылған болатын. Алайда жуырда Қазақстанның вице-премьері Роман Скляр бұл жобаларды елдің өзі жүзеге асыратынын ресми түрде мәлімдеді.