Шымкентте 17 адам балмұздақтан уланып қалған

SMARTNEWS.KZ басылымының хабарлауынша, Шымкентте 17 тұрғын балмұздақ жеп, уланған. Бұл туралы Otyrar.kz арнасы жеткізді.

Мамандардың айтуынша, жаз мезгілінде балмұздақ пен салқын тағамдарды сатып аларда ерекше сақ болу қажет. Қалада қазіргі таңда эпидемиологиялық тұрғыдан жоғары қауіп төндіретін 640 қоғамдық тамақтану орны, сондай-ақ аздаған тәуекелі бар 402 нысан тіркелген. Бұдан бөлек, жұмсақ балмұздақ сататын 98 сауда нүктесі жұмыс істейді.

Дегенмен, санитар мамандар мұндай нысандарды тек жоспар бойынша немесе азаматтардың шағымдары негізінде ғана тексере алады. Себебі заң бойынша себепсіз тексеру жасауға тыйым салынған.

— Прокуратура тапсырмасы немесе мемлекеттік органдар мен жеке тұлғалардың шағымы түскен жағдайда ғана тексеру жүргіземіз. Сонымен қатар алдын алу мақсатында санитарлық-ағарту жұмыстарын да атқарамыз. Егер нысан жоғары қауіп тобына жатса және санитарлық қорытындысы болмаса, оның жұмысы дереу тоқтатылуы мүмкін, — деді қоғамдық тамақтану нысандарын бақылау бөлімінің басшысы Әсем Дәулетова.

Жазда эпидемиологиялық ахуал нашарламауы үшін шомылу орындары мен демалыс аймақтарында бақылау күшейтілген.

— Көпшілікті алаңдататын сұрақ — бассейндерге су қайдан алынады? Егер орталықтандырылған су көзі болмаса, ашық су қоймаларынан алуға рұқсат етіледі. Тек су айналымы тұрақты жүріп, үнемі тазаланып отырса жеткілікті. Қазір көбіне өзін-өзі тазартатын жүйелер пайдаланылады — бұл да рұқсат етілген, — деді коммуналдық нысандарды бақылау бөлімінің басшысы Майра Қарақұлова.

Бұдан бөлек, қалада «Қошқар-Ата», «Сайрамсу», «Бадам» және «Қарасу» өзендерінің жағалауы тазартылып, қоқыс, тұрмыстық қалдықтар мен су өсімдіктері жиналды.