RUS
SMARTNEWS.KZ басылымының хабарлауынша, 3 тамызда өткен видеоконференцияда ОПЕК+ альянсына мүше сегіз мемлекет, соның ішінде Қазақстан, қыркүйек айынан бастап мұнай өндірісін ұлғайту туралы шешім қабылдады. Қосымша көлем – тәулігіне 547 мың баррель. Бұған дейін бұл елдер ерікті түрде өндірісті қысқартқан еді.
Айта кетейік, ОПЕК+ альянсының негізгі қатысушылары – Сауд Арабиясы, Ресей, Қазақстан және тағы бес ел – 2025 жылдың қыркүйегінен бастап мұнай өндірісін тәулігіне 547 мың баррельге арттырады. Бұл шешім 3 тамызда өткен онлайн жиын кезінде қабылданды.
Альянс мәлімдемесінде бұл қадам «нарықтағы қолайлы жағдайлармен» және «мұнай қорының төмен деңгейімен» түсіндірілген. Шешім 2024 жылғы 5 желтоқсанда қабылданған жоспарға сәйкес жүзеге асырылып жатыр. Ол жоспар бойынша, 2025 жылдың 1 сәуірінен бастап 2,2 млн баррельге дейінгі көлемді кезең-кезеңімен қайта өндіруге рұқсат етілген.
Айта кетейік, биыл шілденің басында ОПЕК+ құрамындағы сегіз ел тамыздан бастап өндірісті 548 мың баррельге арттыруға келіскен болатын. Бұл нарық күткен межеден де жоғары көрсеткіш еді. Бұған дейін мұнай өндірісі ай сайын орта есеппен 411 мың баррельге ғана өсіп келген.
Қазақстан үшін бұл шешім экспорттық әлеует пен бюджет кірісін арттыруға мүмкіндік береді. Сонымен қатар, бұл — жаһандық нарықтағы сұраныс қалпына келіп келе жатқанының белгісі.