RUS
SMARTNEWS.KZ басылымының хабарлауынша, Ақтөбе қаласының тұрғын үй-коммуналдық шаруашылығы, жолаушылар көлігі және автомобиль жолдары бөлімі 24 дана биотуалет сатып алуға конкурс жариялады. Жобаға бөлінген сома – 4 821 428 теңге, деп жеткізді «Диапазон».
30 шілдедегі мәлімет бойынша, әлеуетті жеткізушімен келісімшарт әлі бекітілмеген.
Техникалық сипаттамаларға сәйкес, биотуалет соққыға төзімді пластик пен металдан жасалуы тиіс. Ішінде қағаз ұстағыш пен киім ілетін ілгек болады. Әр дәретхана 250 литрлік су жинақтау ыдысымен жабдықталып, шамамен 600 рет қолдануға есептелген.
Құжаттамада көрсетілгендей, дәретханалардың тазаланып, дизенфекциялануына мүмкіндік беретін люк не алынбалы бак болуы шарт. Сонымен қатар, барлық биотуалеттер 2024 жылдан ерте шығарылмауы тиіс.
Әкімдік өкілдері мұндай дәретханалар орталықтандырылған кәріз жүйесі немесе тұрақты әжетханасы жоқ жерлерге – жәрмеңкелерде, қоғамдық шараларда, саябақтарда – орнатылатынын айтты.