RUS
SMARTNEWS.KZ басылымының хабарлауынша, Атырау облысында құны 1,6 миллиард теңге болатын пайдаланылмаған жер телімі мемлекет меншігіне өтті. Бұл жер «Атырау Нефтехим» ЖШС-на тиесілі болған. Компанияны ресейлік «СИБУР Холдинг» пен Тимур Құлыбаевтың Almex Petrochemical фирмасы бірлесіп бақылайды.
Атырау облыстық прокуратурасы 4 тамызда таратқан мәліметке сәйкес, мемлекетке жалпы ауданы 31,4 мың гектарды құрайтын 16 пайдаланылмаған жер учаскесі қайтарылған. Олардың жалпы құны 196 миллион теңгеге бағаланып отыр.
Бұған қоса, арнайы экономикалық аймақтан да жер қайтарылғаны атап өтілді.
«Арнайы экономикалық аймақ – „Ұлттық индустриялық мұнай-химия технопаркіне“ жүргізілген тексеріс нәтижесінде сенімгерлік басқару шарты бұзылып, ауданы 106 гектар, құны 1,6 миллиард теңге болатын пайдаланылмаған жер учаскесі мемлекетке қайтарылды. Ол „Атырау Нефтехим“ ЖШС-не тиесілі болған. Сонымен қатар, міндеттемелерін орындамағаны үшін бұл компания арнайы экономикалық аймақ қатысушыларынан шығарылды», — делінген Атырау облысы прокуратурасының хабарламасында.
«Атырау Нефтехим» ЖШС-нің құрылтайшылары — Almex Petrochemical ЖШС мен Ресейдің «СИБУР Холдингі». Өз кезегінде Almex Petrochemical компаниясының жалғыз иесі — Joint Technologies ЖШС. Бұл компания Тимур Құлыбаевқа тиесілі «Кипрос» ЖШС арқылы бақыланады. Онымен бірге Құлыбаевтың бұрыннан бірге жұмыс істейтін серіктесі Раушан Сағдиева да үлеске ие.