RUS
inDrive компаниясы жол үстінде өзін-өзі қанағаттандырған такси жүргізушісінің әрекетіне қатысты ресми мәлімдеме жариялады. Қызмет көрсету кезінде орын алған оқиға қоғамның ашуын туғызып, әлеуметтік желілерде қызу талқыланған еді.
Компанияның айтуынша, оқиға туралы мәлімет түскен бойда олар дереу ішкі тексеріс бастаған.
«Қыздың мұндай күйзеліске тап болғанына шын жүректен өкініш білдіреміз. Біз онымен дереу байланысып, кешірім сұрадық. Бұл жүргізуші сервистен біржола аластатылды. Мұндай әрекетке жол берілмейді», – деп жазылған компания таратқан хабарламада.
inDrive өкілдері жәбірленушінің батылдығы мен әділеттілікке деген ұмтылысын қолдайтындарын және қажет болған жағдайда көмектесуге дайын екендерін айтты.
Компания өкілдерінің сөзінше, қолданушылардың, әсіресе әйелдердің қауіпсіздігі — басты басымдық. Осыған байланысты олар жүргізушілерді тексеру жүйесін күшейтіп, қосымшадағы қауіпсіздік функцияларын жетілдіріп жатқанын жеткізді.
«Келіп түскен әрбір шағымды мұқият қарап, ресми сұраныс болса, құқық қорғау органдарымен әрдайым ынтымақтастыққа дайынбыз. Мұндай жағдайлардың ашық айтылуы маңызды деп санаймыз», – дейді inDrive.
Компания сондай-ақ, жолаушылардан қауіп төнген жағдайда келесі әрекеттерді жасауды сұрайды:
Қосымшадағы «Қалқан» түймесін басып, қолдау чатына жазу
Жиектегі мәзірдегі «Қауіпсіздік» бөліміне кіріп, шағым қалдыру
Сапар жайсыз басталса, бірден тоқтатып, пікір қалдыру
Сапар соңында төмен баға қойып, пікір жазу — мұндай мәліметтер де бақылауға алынады
inDrive қосымшасындағы қауіпсіздік функциялары:
Сапарды жақын адаммен бөлісу мүмкіндігі
112 нөміріне бір батырмамен қоңырау шалу
Шұғыл жағдайда байланысатын адамды алдын ала белгілеу
Компания осындай оқиғалардың қайталанбауы үшін жүйелі жұмыс жүргізілетінін мәлімдеді.