RUS
SMARTNEWS.KZ басылымының хабарлауынша, Бангкокта өтіп жатқан жастар арасындағы (U-22) Азия чемпионатында Қазақстан құрамасы төрешілер шешіміне наразы.
75 келіге дейінгі салмақта өнер көрсеткен Аман Қонысбеков өзбек спортшысы Шавкатжон Болтаевпен болған ширек финалдық жекпе-жекте жеңілді деп танылды. Алайда қазақстандық тарап бұл шешіммен келіспей отыр.
Аман Қонысбековтің өзі де рингтен кейін пікір білдіріп, өз ұстанымын ашық жеткізді:
«Барлығын Алла көріп тұр! Мен үшін бұл үйреншікті жағдай. Мен ондайға сынбаймын», – деді боксшы.
Бұған дейін Asian Boxing ережелеріне сай жекпе-жек нәтижесіне шағым түсіруге тыйым салынған еді. Алайда соңғы уақытта ирандық, үндістандық және тағы басқа елдердің боксшыларымен байланысты бірнеше даулы шешімдерден кейін жаңа құрылым төрешілер шешімін қайта қарауға рұқсат берді.
Бұл мүмкіндікті пайдаланған Қазақстан тарапы бірден екі жекпе-жек бойынша ресми түрде наразылық білдірді. Олар Нұрзат Оңғаров пен индонезиялық Тахумил арасындағы кездесу, сондай-ақ Аман Қонысбеков пен өзбек Шавкатжон Болтаев арасындағы жекпе-жек.
Қазақстандық делегация аталған кездесулерде төрешілер шешімі әділетсіз болды деп санайды және жекпе-жектердің нәтижесін қайта қарауды талап етіп отыр.
Қазіргі таңда арыз Asian Boxing ұйымының жаңа ережелеріне сәйкес қаралып жатыр. Шешім жақын күндері шығуы мүмкін.