RUS
SMARTNEWS.KZ басылымының хабарлауынша, АҚШ президенті Дональд Трамп мұнай бағасының тағы да 10 долларға құлдырауы Ресейге Украинадағы соғысты тоқтатудан басқа амал қалдырмайтынын айтты. Бұл туралы ол CNBC News арнасына берген сұхбатында мәлімдеді.
«Егер мұнай тағы 10 долларға арзандаса, Путиннің таңдау мүмкіндігі қалмайды. Экономика онсыз да ауыр жағдайда», – деді Трамп.
Сондай-ақ ол алдағы 24 сағат ішінде Үндістанға қарсы импорттық баж салығын едәуір көтеретінін айтты. Себебі, бұл ел Ресейден мұнай сатып алуды жалғастырып жатыр.
«Біз 25 пайызбен тоқтаған едік, бірақ келесі тәулікте бұл салықты едәуір көтеремін деп отырмын. Олар Ресейдің мұнайын сатып алуда», – деді АҚШ президенті.
Айта кетейік, қазір әлемдік мұнай бағасы төмендеуін жалғастыруда. Астана уақытымен 18:00-де Brent маркалы мұнайдың қазан айына арналған фьючерстері Лондондағы ICE биржасында 1,24%-ға төмендеп, барреліне 67,87 доллар болды. Ал WTI маркалы мұнайдың қыркүйектегі фьючерстері 1,4%-ға арзандап, 65,36 долларды құрады.
Мұнай бағасының құлдырауы Қазақстан экономикасына тікелей әсер етеді. Өйткені ел әлі де көмірсутектерді экспорттаушы мемлекет саналады және мұнай кірісіне қатты тәуелді. Айта кетейік, 2025 жылғы республикалық бюджетте мұнайдың бір баррелі 75 доллар деңгейінде белгіленген.