RUS
SMARTNEWS.KZ басылымының хабарлауынша, Балқашта 8 жастағы баланы қатыгездікпен ұрып-соғу ісіне күдікті ер адам қамауға алынды. Алайда ол да қарсы арыз түсірді. Бұл туралы Қарағанды облыстық полиция департаментінің баспасөз қызметі мәлім етті.
Күдікті уақытша ұстау изоляторына қамалған. Сонымен бірге, қазіргі уақытта полиция оның өз арызы бойынша да тексеру жүргізіп жатыр. Ер адам баланы «өз қызымен әдепсіз әрекет жасауға тырысты» деп айыптап отыр.
— Барлық нұсқалар мен тараптардың уәждері тексерілуде. Тергеу мүддесіне байланысты басқа ақпарат жарияланбайды, — деді департамент өкілдері.
Осы оқиғаға байланысты жақында Балқаш тұрғыны Мәдина Досымбекова әлеуметтік желіде видеоүндеу жариялап, 8 жасар ұлын ересек ер адам — «Қазақмыс» қызметкері — қатыгездікпен ұрғанын мәлімдеді.
Оның айтуынша, күдіктінің құқық қорғау органдарында, ауруханада және өзге де мемлекеттік мекемелерде байланыстары бар. Сол себепті істі жауып тастауға әрекет жасалып жатыр деп қауіптенеді.
Мәдина жұртшылықтан қолдау сұрап, істің әділ тергелуін талап етті.