RUS
SMARTNEWS.KZ басылымының хабарлауынша, Дания, Норвегия және Швеция Украинаға арнап құны 500 миллион доллар болатын жаңа әскери көмек пакетін ұсынатынын мәлімдеді. Бұл пакет НАТО-ның АҚШ-пен бірлескен жаңа бастамасы — Priority Ukraine Requirements List (PURL) бағдарламасы аясында жеткізіледі.
Көмекке Украина қарулы күштеріне арналған техника мен оқ-дәрілер кіреді. НАТО баспасөз қызметінің мәліметінше, бұл – одақтың Украинаға жүйелі түрде көмек көрсетуге бағытталған алғашқы қадамдарының бірі.
Аталған үш елдің бұл шешімі Нидерландтың бастамасынан кейін қабылданды. Айта кетейік, Нидерланд — PURL бағдарламасы аясындағы алғашқы көмек пакетін толық қаржыландырған алғашқы НАТО мүшесі.
Жалпы алғанда, қазіргі таңда PURL бастамасы бойынша жиналған қаражат 1 миллиард доллардан асып жығылады. Бұл қаражат Украинаға жеткізілетін алғашқы екі кезеңдік көмекті қамтиды.
Украина президенті Владимир Зеленский бұл қолдауды жоғары бағалап, Telegram-арнасында:
«Бұл Америка мен Еуропа арасындағы қауіпсіздік саласындағы ынтымақтастықты күшейтуге үлгі болмақ», — деп жазды.
НАТО-ның ресми сайтында жарияланғандай, PURL бағдарламасы аясында Украинаға соғыс жағдайында ең қажет деп танылған қару-жарақ пен оқ-дәрілердің кезең-кезеңімен жеткізілуі көзделген. Әрбір көмек пакеті шамамен 500 миллион долларды құрайды.
Бұған дейін Зеленский мен АҚШ президенті Дональд Трамп телефон арқылы сөйлесіп, Украинадағы жағдай мен қолдау тетіктерін талқылаған еді.