RUS
SMARTNEWS.KZ басылымының хабарлауынша, «Қазақстан темір жолы – Жүк тасымалы» ЖШС бас директорының орынбасары Асан Үмбетов өзінің қатысуымен тараған даулы видеоға қатысты пікір білдірді.
Видеоны басында Үмбетов жұмыс жолын қарапайым қызметтен бастағанын және машинист ретінде жинаған тәжірибесін айтып береді. Бұдан соң ол кең тараған даулы жағдайға тоқталды.
«Бұл видеоны бәріміз көрдік, мен де көрдім. Ондағы жағдайлар шынымен орын алған. Мен бұл жиналысты теміржолдағы қозғалыс қауіпсіздігіне арнап өткіздім. Мұндағы мақсат — нақты біреуді кінәлау емес, әріптестеріміздің жұмыс сапасын жақсартып, кемшіліктерді түзету еді. Сол себепті дауыс көтеруге мәжбүр болдым», – деді Үмбетов.
Оның айтуынша, видеоны көрген соң өзінің қателіктерін түсінген.
«Кейін басшылық маған ескерту жасады. Алдағы уақытта әріптестермен қарым-қатынаста бұл ескерілетін болады», – деді ол.
Айта кетейік, әлеуметтік желіде тараған видеода Асан Үмбетовтың қызметкерлерге боқауыз сөздер айтып, ашулы күйде сөйлегені байқалады. Бұл жайт қоғамда қызу талқыға түсті.