RUS
SMARTNEWS.KZ басылымының хабарлауынша, Қазақстан вице-премьері Қанат Бозымбаев еліміздегі жол сапасына шүйлікті. Әсіресе, Батыс Қазақстан облысына сапары кезінде ол бұл мәселені өз омыртқасымен сезінгенін айтты.
«Сапар барысында су тасқынының салдарын көру үшін біраз жерді араладық. Алты айдай уақытым батыста өтті. Соның бәрін омыртқаммен сезіндім десем артық емес. Ол жақтағы республикалық та, жергілікті де жолдар шұрық-тесік. Қаржыландыруды барынша күшейту қажет», – деді Бозымбаев Үкіметтегі баспасөз мәслихатында.
Оның айтуынша, еліміздің кей аймақтарында жол жүру азапқа айналған. Тас жолдардың тозуы – тек көлікке емес, адамның денсаулығына да кері әсер етіп отыр.
Айта кетейік, жуырда «Қазавтожол» компаниясының басшысы Дархан Имашев БАҚ өкілдерімен кездесіп, еліміздегі жолдардың жай-күйі туралы сұрақтарға жауап берді. Журналистер жол сапасынан бастап, ақылы жолдар, жол бойындағы әжетханалар, апаттар мен жөндеуге жұмсалған рекордтық қаражаттарға дейін түрлі мәселелерді көтерді.