RUS
SMARTNEWS.KZ басылымының хабарлауынша, Жапония үкіметі Қазақстанға бір миллиард иеннен астам (шамамен 7 миллион доллар немесе төрт миллиард теңге) көлемінде грант бөледі. Бұл қаржы Семейдегі ядролық сынақтардан зардап шеккендерге көмек көрсетуге бағытталады.
Қазақстан Денсаулық сақтау министрлігінің мәліметінше, қаражатқа Университеттік госпиталь үшін заманауи медициналық жабдықтар сатып алынады. Атап айтқанда, магнитті-резонанстық томограф, компьютерлік томограф, бейнеэндоскопиялық жүйе, жасанды қанайналым аппараты және ауыр науқастарды диагностикалау мен емдеуге қажет өзге де құрылғылар алынады.
Министрліктің жауабында келісімшарттың екі ел арасында қазір келісу сатысында екені айтылған. Жапония мен Қазақстанның бұл саладағы әріптестігі бұрыннан жалғасып келеді. 2002 жылдан бері Семейде радиациядан зардап шеккендерді тіркеудің мемлекеттік жүйесі жұмыс істейді. Ол жапондық тәжірибе негізінде құрылған.