RUS
SMARTNEWS.KZ басылымының хабарлауынша, Израиль премьер-министрі Биньямин Нетаньяху Газа секторындағы әскери операцияны кеңейту жоспарын қорғап, елдің «соңына дейін барудан басқа жолы жоқ» екенін мәлімдеді.
Иерусалимде шетелдік БАҚ өкілдерімен кездесуінде ол: «Біздің мақсатымыз – Газаны оккупациялау емес, ХАМАС террористерінен азат ету», – деді.
Премьердің айтуынша, операцияның негізгі міндеттері – тұтқындарды босату, ХАМАС-ты толық жою, Газаны қарусыздандыру және қауіпсіздікті Израиль әскері қамтамасыз ететін, ал басқаруды «израильдік емес азаматтық әкімшілік» жүргізетін жүйе құру.
Нетаньяху халықаралық аренада Израиль саясатына қарсы «жалған ақпарат науқаны» жүріп жатқанын айтып, сыншыларға жауап берді. Сондай-ақ ол Израиль қорғаныс күштеріне шетелдік журналистерді көбірек тарту туралы тапсырма бергенін жеткізді.
Германия канцлері Фридрих Мерцтің Израильге кей әскери жабдық экспортын тоқтату шешіміне қатысты Нетаньяху: «Ол – Израильдің досы, бірақ бұл жолы ол жалған ақпарат пен ішкі қысымға берілді», – деп пікір білдірді.
Сонымен қатар премьер 2023 жылғы 7 қазандағы ХАМАС шабуылын ұмытпауға шақырды. Сол күні 1200-ге жуық адам қаза тауып, 251 адам тұтқындалған еді. Қазір олардың шамамен 50-і әлі Газада, 20-сының тірі екені белгілі.
Биліктің Газа қаласын басып алу жоспары Израиль ішінде де наразылық туғызды. Сенбі күні Тель-Авивте өткен ірі антиүкіметтік митингте марқұмдардың, бостандыққа шыққан және әлі де тұтқында отырғандардың туыстары келесі аптада жалпыұлттық ереуіл жариялауға шақырды.
Жексенбі күні Израиль қорғаныс министрі Исраэль Кац Иордан өзенінің Батыс жағалауының солтүстігіне барып, онда әскер кемінде жыл соңына дейін қалатынын мәлімдеді. Биыл бұл аймақта 40 мыңға жуық палестиналық үйінен айырылып, 1967 жылдан бергі ең ірі көшіру жағдайы тіркелді. Израиль бұл әрекеттерді қауіпсіздік мақсатында жасап отырғанын айтады.