RUS
Еліміздің тарихында діни ағартушылықты жалғап, елге өнеге болған әулие-әнбие, ишан-молдалар аз болмаған. Бүгінде де сол жолды жалғап, қоғамда имандылықты насихаттап жүрген тұлғалар бар. Солардың бірі – Астанадағы Ырыскелді қажы мешітінің бас имамы, халық арасында «Нұрлан имам» атымен танымал Нұрлан Байжігітұлы. Қазақы болмысымен, діни білімінің тереңдігімен және елмен етене тіл табысуымен жұрттың құрметіне бөленген ол иман, дәстүр және қоғам мәселелері жөнінде өз ойымен Astana Aqshamy басылымына берген сұхбатында бөлісті.
Нұрлан имамның айтуынша, оның имамдық жолға түсуіне ең алдымен нағашы атасы – Меркі медресесінде қызмет атқарған Жақсымбет ақсақал себепкер болған. Атасының мешіт пен шәкірттерге сіңірген еңбегі, әжесі Жаңылдың қатаң әрі жүйелі тәрбиесі оның бойына жауапкершілік пен білімге құштарлық дарытқан.
Балалық шағында мешітке атасымен бірге барып, ақсақалдардың даналығын көріп өскен ол, имам болғысы келген кез келген жас тек мектептен емес, осындай рухани ортадан да тағылым алуы тиіс дейді.
«Әжем жаңылтпаш, мақал-мәтел, билердің нақылын жаттататын. Бұл – сөз қорымды байытып, көпшілік алдында сөйлеуіме үйретті», – дейді имам.
Ол имам үшін діни біліммен қатар педагогика, психология, саясаттану секілді пәндерді білу маңызды екенін атап өтті. «Көп адам әр мәселені тек Құран мен хадиске сүйеп, тыңдарманның қабылдау деңгейін ескермейді. Соның салдарынан қоғамда түсінбеушілік туады», – дейді ол.
Нұрлан Байжігітұлының пікірінше, дін – рухани бағдар, дәстүр – ұлттық болмыс.
«Дәстүрді шариғат таразысына салып, заман талабына сай жаңарту, ал дінді ұлттық болмыспен ұштастырып түсіндіру керек. Екеуі де ұлтымызды өрге сүйреген құндылықтар, оларды бөлуге болмайды», – дейді ол.
Имам әсіре діншілдіктің қоғамға зиян тигізетінін де ескертті. «Ұлттық киім – имандылықтың символы. Бетін тұмшалап, қап-қара киіну – біздің салтқа да, өмірімізге де жат», – деп санайды ол.
Қазіргі жастардың дінге бет бұруын имам екі қырынан бағалайды. Бір жағынан, ақпаратқа қолжетімділік артқан, екінші жағынан, сарапсыз еліктеу мен фанатизм көбейген.
«Көпшілік уағыз тыңдайды, бірақ оны өміріне енгізбейді. Ал алған білімін дұрыс түсінбей, өзгеге үйретуге асығатындар да бар», – дейді ол.
Киім – иманның бір ғана белгісі, бірақ адамның діндарлығын сыртқы келбетіне қарап бағалау қате, дейді Нұрлан имам.
«Мәселе – жүректегі сенімде. Ішкі болмыс түзелсе, ол сыртқы бейнеде көрініс табады», – деп түйіндейді ол.