RUS
SMARTNEWS.KZ басылымының хабарлауынша, Газа қаласындағы «Аш-Шифа» ауруханасы аумағына жасалған әуе шабуылы салдарынан «Аль-Джазира» телеарнасының бес қызметкері қаза тапты. Олардың арасында танымал палестиналық тілші Анас аш-Шариф, журналист Мохаммед Курейка және үш оператор бар.
Медициналық дереккөздердің айтуынша, соққы аурухананың зақымдалған ғимараты маңындағы журналистерге арналған шатырға тиген. Шабуылдан тағы кемінде үш бейбіт тұрғын көз жұмды.
Израиль қорғаныс күштері аш-Шарифтің нысаналы түрде атылғанын растады. Әскерилер оны ХАМАС-тың жасырын ұяшығын басқарып, өзін журналист ретінде көрсеткен деп айыптады. Бұған дейін аш-Шариф пен «Аль-Джазира» бұл мәлімдемелерді жоққа шығарған. Израиль тарабы Газа секторында табылған барлау деректері мен құжаттар оның ХАМАС-пен байланысын дәлелдейді деп отыр. Сондай-ақ ЦАХАЛ өкілдері тілшіні «Израильдің бейбіт тұрғындары мен әскеріне қарсы зымыран шабуылдарын басқарған» деп мәлімдеді.
Бұл соққы израильдік әскерилердің аш-Шариф пен «Аль-Джазира» журналистерін ХАМАС және «Исламдық жиһад» топтарына қатысы бар деп алғаш айыптағанынан бір жыл өтпей жасалды. 24 шілдеде Израиль армиясының өкілі Авичай Адраи да телеарнаны және аш-Шарифті ХАМАС-тың әскери қанатымен байланысы бар деп сынға алған.
Өткен айда Журналистерді қорғау комитеті (CPJ) тілшінің қауіпсіздігіне алаңдап, оны «Израиль әскери күштерінің қаралау науқанының» нысанасына айналды деп мәлімдеген еді.
«Аль-Джазира» жексенбі күнгі әуе соққысын «қасақана жасалған кісі өлтіру» деп айыптады. 28 жастағы аш-Шариф Газа секторында қақтығысты оқиға орнынан үздіксіз хабарлап, Израильдің медиаға тыйымына қарамастан ақпарат таратумен танылған.
Оның қазасынан кейін X әлеуметтік желісіндегі парақшасында достары жариялаған соңғы жазбасында тілші:
«Мен өз халқымның үні мен тірегі болу үшін бар күшімді салдым. Шындықты еш бұрмалаусыз жеткізуден бір күн де тайынған емеспін» деп жазған.
CPJ дерегінше, 2023 жылғы қазан айында Израиль мен ХАМАС арасындағы соғыс басталғалы 186-ға жуық журналист қаза тапқан. Бұл — соңғы жылдардағы тілшілер үшін ең қауіпті қақтығыстардың бірі болып отыр.