RUS
SMARTNEWS.KZ басылымының хабарлауынша, АҚШ президенті Дональд Трамп Қытаймен жасалған «тарифтік бітімнің» мерзімін тағы үш айға ұзартты. Бұл шешім дүйсенбі күні, бұрынғы келісімнің уақыты аяқталуына бірнеше сағат қалғанда қабылданды.
Ақ үй басшысы қол қойған жарлықсыз АҚШ-қа әкелінетін қытай тауарларына баж салығы 145%-ға дейін көтерілер еді.
Бұған дейін Қытайдың Сыртқы істер министрлігі Вашингтонның «теңдік, өзара құрмет және өзара тиімділік» қағидаттары негізінде оң нәтижеге ұмтылатынына үміт білдірген.
Сәуір айында Трамп Қытай өнімдеріне 245% көлемінде тариф енгізетінін мәлімдеген. Ал Пекин өз кезегінде 125% деңгейінде баж салығын бекіткен.
Алайда мамыр айының басында қос тарап 90 күндік «тарифтік бітімге» келіп, келіссөз жүргізу және ұстанымдарын нақтылау туралы уағдаласты.
Өткен айда Қытай және АҚШ делегациялары Стокгольмде кездесіп, бітім мерзімін тағы 90 күнге ұзарту туралы шешім қабылдағаны белгілі болды.
Америкалық БАҚ-тың хабарлауынша, Ақ үй өкілдері келіссөздің нәтижесіне оптимистік көзқараста және соңғы келісім алдағы үш айда жасалуы мүмкін екенін жоққа шығармайды.
Дегенмен, Трамп бұл мәселеге қатысты нақты болжам жасамай, тек Қытайдың және жеке Си Цзиньпиннің әрекеттерін жоғары бағалады.
Қос ел арасындағы сауда соғысы, былтырғы деректер бойынша, жиынтық ішкі жалпы өнімі шамамен 50 миллиард долларды құрайтын экономикаларға әсер етіп, әлемдік нарыққа ауыр соққы беруі ықтимал.