RUS
SMARTNEWS.KZ басылымының хабарлауынша, америкалық әнші Мадонна Газа секторындағы балалардың ауыр жағдайына назар аударып, Ватикан мемлекетінің басшысы және католик шіркеуінің рухани жетекшісі Папа Арыстан XIV-ке осы аймаққа баруға үндеу жасады.
«Саясат бұл мәселені шеше алмайды, өзгерістер тек қана халықтың хабардар болуымен келеді», – деп жазды ол әлеуметтік желі X-парақшасында.
Әнші Папаға:
«Уақыт барда Газаға барыңыз, балаларға жарығыңызды сыйлаңыз. Ана ретінде олардың азабына төзе алмаймын. Әлемдегі барлық бала – бәріміздің баламыз» деп жүгінді.
Мадонна Израиль қоршауындағы Газа секторында гуманитарлық дәліздерді ашып, бейкүнә балаларды құтқару қажеттігін айтты.
«Уақыт аз қалды, сондықтан сіз баратыныңызға уәде беріңіз», – деді ол.
Постында әнші ұлы Рокконың туған күні екенін атап өтіп:
«Оған жасай алатын ең жақсы сый – қақтығыс ортасында қалған балаларды құтқару үшін бәрін жасауға шақыру» екенін жеткізді.
Мадонна қақтығыста ешбір тарапты айыптамайтынын және қолдамайтынын атап өтті. Ол көмек бергісі келетіндерді америкалық World Central Kitchen (WCK) ұйымына және израильдік «Women Wage Peace» бастамасына қаржылай үлес қосуға шақырды.
«Барлығы зардап шегіп отыр. Менің жалғыз мақсатым – бұл балалардың аштан қырылмауы», – деді ол.