RUS
SMARTNEWS.KZ басылымының хабарлауынша, 13 тамызға қараған түні Украина мен Ресей бір-бірінің аумағына дрондармен және зымырандармен соққы берді. Шабуылдар салдарынан тұрғын үйлер мен инфрақұрылым нысандары зақымданды, ал екі ел де бірқатар өнеркәсіптік объектілердің шабуылға ұшырағанын хабарлады.
Украина Қарулы күштерінің Әуе күштері хабарлауынша, Ресей түнде 49 дрон және екі баллистикалық зымыран ұшырған. Олардың басым бөлігі атып түсірілгенімен, 15 дрон нысанаға жеткен.
Херсон облысының Берислав ауданында ресейлік дроннан тасталған жарылғыш зат тұрғын көлігінің үстіне түсті. Облыстық әскери әкімшілік басшысы Александр Прокудиннің мәліметінше, шабуыл салдарынан бір ер адам мен бір әйел қаза тапқан.
Таңертең Чернобаевка ауылына артиллериялық соққы жасалып, 1964 жылғы әйел мерт болды. Жарылыс кезінде бір үй толық қирап, бірнеше көрші үйдің шатыры, қасбеті мен терезелері зақымданған.
РФ Қорғаныс министрлігі мәліметінше, түнде ресейлік әуе қорғаныс күштері 46 украиналық ұшқышсыз ұшу аппаратын атып түсірген. Оның ішінде 15 дрон Брянск облысында, 11 — Волгоградта, жеті — Ростовта, бес — Краснодар өлкесінде жойылған.
Волгоград пен Славянск-на-Кубани қалаларындағы мұнай өңдеу зауыттары дрон шабуылына ұшырады. Волгоградта дрон қалдықтары 16 қабатты тұрғын үйдің шатырына құлаған. Облыс губернаторы Андрей Бочаровтың айтуынша, қауіпсіздік мақсатында тұрғындар эвакуацияланып, саперлер аймақты тексеруде. Зардап шеккендер жоқ.
Украина БАҚ-тарының хабарлауынша, елдің Бас барлау басқармасына қарасты дрондар Брянск облысындағы «Унеча» мұнай айдау станциясына соққы берген. NASA спутниктері нысандағы ірі өртті тіркеген.
Бұл соққылар АҚШ пен Ресей президенттері арасындағы келіссөздер қарсаңында болып отыр. Ақ үй Кремльге бітім жасау бойынша қойған мерзімнің аяқталуына аз уақыт қалды.