RUS
SMARTNEWS.KZ басылымының хабарлауынша, АҚШ президенті Дональд Трамп пен Ресей президенті Владимир Путиннің Аляскадағы кездесуі қарсаңында Украина президенті Владимир Зеленский мен оның халықаралық одақтастары бейбіт келісімге келу үшін орындалуы тиіс негізгі шарттарды жария етті.
Берлиннен онлайн форматта өткен жиынға Украина басшысы, бірқатар Еуропа және НАТО елдерінің лидерлері қатысты. Олар АҚШ президенті Дональд Трамп пен вице-президент Джей Ди Вэнске Украинаның мүддесі мен қауіпсіздігі ескерілмейінше, Ресеймен бітім туралы әңгіме жүргізу мүмкін еместігін жеткізді.
Басты талаптар мынадай:
-
Украинасыз келіссөз жүргізілмейді.
«Біз үшжақты форматты қолдаймыз. Атысты тоқтату және қауіпсіздік кепілдігі болуы керек. Президент Трамп бұл ұсыныстарды қолдайтынын айтты», – деді Зеленский. -
Қазіргі майдан шебі – келіссөздің бастапқы нүктесі.
Германия канцлері Фридрих Мерцтің айтуынша, Ресей басып алған аумақтарды заңды түрде тану мүлде қарастырылмайды. -
Қауіпсіздік кепілдіктері.
Украина басшысы Ақ үй бұл мәселеде Киевпен бір пікірде екенін айтты. Франция президенті Эммануэль Макрон да бұл ұстанымды бөлісті: «Бұл – Еуропаның өз проблемасы. Украина – орыс империализміне қарсы алдыңғы шеп. Олар 2008 жылы Кавказда бастаған, әрі қарай да жүре беруі мүмкін», – деді ол. -
Санкцияларды күшейту.
Киев пен оның одақтастары, егер Ресей атысты тоқтатудан бас тартса, оған қысымды арттыру қажет екенін айтты. Зеленскийдің сөзінше, санкциялар Мәскеудің әскери экономикасына соққы беріп отыр: «Путин бейбітшілікті қаламайды, ол елімізді басып алғысы келеді».
Канцлер Мерц Аляскадағы саммитте Еуропа мен Украинаның іргелі қауіпсіздік мүдделері сақталуы тиіс екенін, бұл бағытта АҚШ-пен ортақ мәмілеге келгендерін жеткізді.