RUS
SMARTNEWS.KZ басылымының хабарлауынша, Тәжікстан президенті Эмомали Рахмонның кенже қызы Фарзона Эмомали елдің Денсаулық сақтау министрлігінің маңызды құрылымдарының бірін басқаруға келді. Ол реформалар, алғашқы медициналық-санитарлық көмек және халықаралық байланыстар басқармасының бастығы болып тағайындалды.
27 жастағы Фарзона Эмомали — Тәжік мемлекеттік медицина университетінің емдеу факультетін тәмамдаған. Кейін педиатрия мамандығы бойынша ординатурадан өткен. 2023 жылы Президент жанындағы Мемлекеттік басқару академиясын бітірген. Ол министрліктегі жаңа қызметіне дейін осы басқармада 2021 жылдан бері маман болып жұмыс істеп келген.
Президенттің қызы — Тәжікстан халық-демократиялық партиясының мүшесі. Министрліктің ресми хабарламасында оның тұрмыс құрмағаны және жалғыз бала тәрбиелеп отырғаны айтылған.
Алайда, «Азаттық» радиосының тәжік қызметінің дерегінше, Фарзона 2022 жылы сол кездегі бас прокурор Юсуф Рахмонның ұлы Сафархон Рахмонға тұрмысқа шыққан. 2025 жылы Сафархон Рахмон қызметінен босатылған.
Айта кетейік, Орталық Азияда билік элитасының балалары мемлекеттік құрылымдарда жоғары қызметтерге жиі тағайындалады. 2024 жылдың соңында Түрікменстанның бұрынғы президенті Гурбангулы Бердымұхамедовтің қызы Оғылджаһан Атабаева әкесінің атындағы қайырымдылық қорының емдеу ісі жөніндегі вице-президенті болды. Сол жылы Өзбекстан президенті Шавкат Мирзиёевтің кенже қызы Шахноза елдің Ұлттық паралимпиадалық комитеті төрағасының орынбасары қызметіне сайланды.