RUS
SMARTNEWS.KZ басылымының хабарлауынша, АҚШ президенті Дональд Трамп Украинадағы соғысты бір сәтте тоқтатуға болады деп мәлімдеді. Оның айтуынша, Владимир Зеленский Ресейдің екі талабына келіссе, қақтығыс тоқтайды.
«Зеленский қаласа, соғысты бірден тоқтата алады. Немесе күресті жалғастыра береді. Бәрі қалай басталғанын ұмытпайық. Қырымды қайтару болмайды — ол Обама кезінде, 12 жыл бұрын, бір оқ атылмастан берілген. Ал Украина үшін НАТО-ға кіру де жоқ. Кейбір нәрселер ешқашан өзгермейді», — деп жазды Трамп Truth Social желісіндегі парақшасында.
Бұл мәлімдеме Зеленскийдің Ақ үйге сапары қарсаңында айтылды. Украина президентімен бірге Вашингтонға Ұлыбритания, Италия, Германия, Франция және Финляндия елдерінің көшбасшылары, сондай-ақ НАТО бас хатшысы мен Еуропалық комиссия төрайымы келеді.
«Ертең Ақ үйде тарихи күн болады. Мұндай көп еуропалық лидерлер бір уақытта бұрын-соңды жиналған емес. Олармен кездесу — мен үшін үлкен мәртебе», — деп жазды Трамп басқа бір жазбасында.
CNN мәліметінше, Трамптың бұл пікірі Зеленскийдің Вашингтондағы кездесуде айтарлықтай қысымға тап болуы мүмкін екенін аңғартады. Телеарна атап өткендей, Қырымнан бас тарту және НАТО-ға мүше болмау — Ресей президенті Владимир Путиннің де негізгі талаптарының қатарында бар.