RUS
SMARTNEWS.KZ басылымының хабарлауынша, ҰҚК-нің бұрынғы басшысы Карим Мәсімовке тиесілі зергерлік және коллекциялық бұйымдар сатылымға шығарылып, аукционнан 10 миллион теңгеден астам қаражат түсті.
«Қайтарылған активтерді басқару компаниясы» ЖШС мәліметінше, аукциондық сауда 15 тамыз күні электронды платформа E-Qazyna арқылы өтті. Саудаға 43 лот қойылған, олардың қатарында естелік монеталар, қылыштар мен өзге де заттар бар.
Жалпы бастапқы баға 7 млн теңге шамасында болса, қатысушылардың белсенділігі мен бәсекелестікке байланысты соңғы сома 10 млн теңгеден асып түсті.
Ережеге сәйкес, аукционнан кейін 10 жұмыс күні ішінде жеңімпаздармен сатып алу-сату келісімшарты жасалады. Ал мүлікті тапсыру тек толық төлем жасалған соң жүзеге асырылады.
Жиналған қаражат толығымен Арнайы мемлекеттік қорға аударылмақ. Бұл қордан білім беру, денсаулық сақтау, инфрақұрылым және әлеуметтік осал топтарды қолдау бағытындағы жобалар қаржыландырылады.
Компания өкілдері атап өткендей, мұндай сауда-саттықтың басты мақсаты – айқындық, тиімділік және қоғам игілігіне жұмыс істеу.