RUS
SMARTNEWS.KZ басылымының хабарлауынша, терезеден лақтырылғаннан кейін аман қалған жеті жасар бала қазір облыстағы ауылдардың бірінде әкесінің қарауында. Ол қалаға қайта барудан үзілді-кесілді бас тартқан. Бұл туралы Kazinform жазды.
Павлодар облысының балалар құқығы жөніндегі уәкілі Сәуле Шәкенова баламен тілдесіп қайтқанын айтты. Оның сөзінше, жеткіншек Екібастұз маңындағы ауылда тұрып жатыр. Әзірге оған інісінің қаза болғаны жайлы айтылмаған.
— Әңгіме барысында бала ауылда қала бергісі келетінін жеткізді. «20 жыл осында тұрамын», — деді ол. Қалаға оралудан үзілді-кесілді бас тартты. Әкесі де ұлының қасында болу үшін ауылға көшіп баруға дайын екенін айтты. Осы жағдайды бірден Екібастұз қаласы әкімінің орынбасары Бибігүл Иманғалиеваға баяндадым. Ол баланың медициналық қолдау, оңалту, мектепке ауысу мәселелері және әкесін жұмысқа орналастыру ісі жеке бақылауға алынатынын жеткізді, — деді омбудсмен.
Қазіргі уақытта баланың қасында әкесі бар. Ол баласының көз алдында болып, жанынан бір елі қалмауды жөн көріп отыр.
Жеткіншек ауруханада жатқанда психологтармен жұмыс істеген. Мамандардың айтуынша, оған мұндай көмек ұзақ уақыт қажет болады.