RUS
SMARTNEWS.KZ басылымының хабарлауынша, Қазақстанның ең ірі қаржы институттарының бірі – «Қазақстан Халық банкі» АҚ 2025 жылдың алғашқы жарты жылдығында таза пайдасын өткен жылдың сәйкес кезеңімен салыстырғанда 39,4%-ға арттырды.
Банктің KASE сайтында жарияланған қаржылық есебіне сәйкес, негізгі өсім несиелеу көлемінің артуы мен транзакциялық бизнестің кеңеюінен болған. Дегенмен кіріс одан да жоғары болуы мүмкін еді, бірақ салықтық шектеулер әсер етті.
«2025 жылдан бастап енгізілген кейбір банктік операцияларға қатысты суперпайда салығы таза табысқа теріс әсер етті. Егер депозиттерді өтеу және бұл салықты есептемесек, таза пайда өсімі 19,8% болады», – делінген ресми мәліметте.
Алғашқы алты айда Halyk Bank-тің пайыздық кірісі 27,4%-ға артқан. Бұған клиенттерге берілген қарыздардың орташа көлемінің өсуі ықпал еткен. Сонымен қатар пайыздық шығындар да 27,6%-ға көтерілген. Бұған орташа мөлшерлеменің ұлғаюы, клиенттердің депозиттік қалдықтарының көбеюі және салымшылардың теңгедегі жинақ үлесінің артуы себеп болған.
Айта кетейік, Halyk Bank-тің бақылау пакеті Құлыбаевтар әулетіне тиесілі. 2025 жылдың алғашқы тоқсанында да банк жоғары табыс көрсеткен болатын. Сарапшылардың пікірінше, қаржы ұйымы кірістің бір бөлігін жаңа нарықтарға шығуға жұмсауы мүмкін.
Жуырда Halyk Bank Өзбекстанның жетекші төлем жүйелерінің біріне үлес сатып алу үшін жергілікті АО «Click» компаниясымен стратегиялық келісімге қол қойған еді.